Poslovne vesti - Makedonija

Рокот за субвенции до 31. јули

Рокот за поднесување барања за субвенции наместо до 20. јуни 2012. година е пролонгиран до 31. јули 2012. година.

Ова е регулирано со Уредба за изменување и дополнување на Уредбата за поблиските критериуми за директни плаќања за 2012. година, што на барање на земјоделците и здруженијата на земјоделци, Владата ја донесе на предлог од Министерството за земјоделство, шумарство и водостопанство.

„Земјоделците побараа продолжување на рокот за поднесување барања по Програмата поради воведувањето нов систем на администрирање на директните плаќања во Република Македонија. Во насока на воспоставување Интегриран систем за администрација и контрола, се изврши интегрирање на софтверот за директни плаќања со софтверот на Единствениот регистар на земјоделски стопанства, при што се овозможи значајно намалување на документите кои барателите ги доставуваат во прилог на барањата“, се наведува во соопштението од Министерството за земјоделство.

Продолжениот рок за поднесување на барањата за субвенции ќе придонесе за целосен опфат на земјоделските стопанства во процесот на поднесување барања.